Lessoonyn Meanagh

Intermediate Lessons

lesson 20: Coloayrtys - A Conversation

Fastyr mie

Fastyr mie. Kys t’ou?

Braew, braew, gura mie ayd. As oo hene?

Ta mee castreycair, gura mie ayd. Cre'n ennym t'ort?

Ta'n ennym orrym Stewart. Cre’n ennym t'ort?

Mish Bob. C'raad t'ou cummal?

Ta mee cummal ayns Rhumsaa. Mie lhiat Rhumsaa?

S’mie lhiam. Insh dou, vel oo gobbraghey ayns Rhumsaa?

Cha nel, cha nel mee gobbraghey ayns Rhumsaa. Ta mee gobbraghey ayns Doolish.

Nee coontysseyr uss?

Cha nee. She fir-ynsee mish. Ta mee gobbraghey ayns scoill ayns Doolish.

Mie lhiat gobbraghey ayns Doolish?

Cha mie lhiam. Cha nel mee maynrey. By vie lhiam gobbraghey ayns Rhumsaa.

Ta mee toiggal. As c'ren traa t'ou goll dys obbyr ’sy voghrey?

Mysh lieh-oor lurg hoght. Ta mee cliaghtey goll eddyr kerroo lurg hoght as kerroo gys nuy.

Cre’n traa t'ou girree?

Ta mee girree ec shiaght as ta mee goaill anjeeal eddyr shiaght as hoght.

Vel paitçhyn ayd?

Ta, ta tree paitçhyn aym - daa inneen as un vac. S’mie lesh ny paitçhyn aym geaishtagh rish Moghrey Jedoonee as Claare ny Gael er y radio Jedoonee.

S’mie shen. Ta mee cliaghtey geaishtagh rish Shiaght Laa Jecrean, agh s’mie lhiam jeeaghyn er y çhellveeish. C'red v'ou jannoo jea?

Va mee gobbraghey. Ren mee goll dy valley ec lieh-oor lurg queig. Mysh hoght er y chlag ’syn ’astyr va mee loayrt rish my charrey, Tom.

C'raad ta Tom cummal?

T'eh cummal as gobbraghey ayns Balley Keeill Eoin. She eirinagh eshyn.

As kanys ta Tom?

V’eh trimshagh agglagh shiaghtin er-dy-henney, agh v’eh mie dy liooar jea. T’eh goll as gaccan.

Vel Gaelg ec Tom?

Beggan, agh t'eh gynsaghey. She Manninagh Tom, as t’eh geearree loayrt Gaelg.

S’mie shen. By vie lhiat caffee?

Cha by vie lhiam, gura mie ayd. Agh by vie lhiam tey. S’mie lhiam bainney agh cha mie lhiam shugyr. Vel brishtagyn ayd?

Ta, ta brishtagyn aym. Mie lhiat berreen?

Cha mie lhiam. Vel bonnag as eeym ayd? Ta accrys orrym.

Cha nel, agh ta arran as eeym aym.

Gura mie ayd. Insh dou, c’raad va Jonee jea?

V’ee ayns Balleychashtal. T’ee gobbraghey ayns Balleychashtal eddyr jeih er y chlag ’sy voghrey as kiare er y chlag syn ’astyr.

C’red t’ee jannoo? Vel ee gobbraghey ayns offish?

Cha nel. Shappeyder ish. Shiaghtin er-dy-henney va mee loayrt ree ayns y chap eck ayns Balleychashtal. Row uss ayns Balleychashtal y çhiaghtin shoh chaie?

Cha row. Cha row mee gobbraghey, agh va mee shappal ayns Purt ny h-Inshey Jecrean chaie. Va mee ayns Skylley Maayl Jerdein as Laksaah Jeheiney, agh cha row mee ayns Balleychashtal.

Gura mie ayd son loayrt rhym, agh ta mee skee agglagh nish. By vie lhiam goll dy valley. By vie lhiam loayrt rhyt reesht. Insh dou, cre’n earroo çhellvane ayd?

Shiaght, hoght, tree / Nane, neu-nhee, jees.

Abbyr shen reesht, my sailt.

Shiaght, hoght, tree / Nane, neu-nhee, jees.

Gura mie ayd.

She dty vea.

Shoh yn earroo çhellvane aym – nuy, kiare, shey / queig, tree, hoght.

Nuy, kiare, shey / queig, tree, hoght?

Shen eh.

Gura mie ayd.

She dty vea. Hee'm oo.

Slane lhiat.

As shen eh woish Lessoon Feed.

Download MP3

Return to Index