Art voish ny pabyryn: Toshaight Arree 2018

Va caa aym dy yeeaghyn er paart dy ghramaghyn mie er yn çhellveeish (ny er y ghlioonag) er y gherrit shoh ta soilshaghey cooishyn glare ny share na’n chooid smoo dy chlaareyn ta ry gheddyn, yn feallagh ta jeant ayns Sostyn ec y chooid sloo.

            Hoshiaght ooilley ta McMafia er BBC 1, drama ta soit ayns towse ennagh er lioar firrinagh jeh’n un ennym mychione kimmeeys eddyr-ashoonagh y laa t’ayn jiu. Ta’n drama geiyrt er Alex Godman, mac da fer-dellal Rooshagh t’er naase seose ayns Lunnin, choud’s ta folliaghtyn as shenn noidyn e chynney berraghtyn er as tayrn eh ny s’diuney as ny s’diuney stiagh ayns seihll dy smuggleraght druggyn, laue-lajerys as creck sleih.

            Cha row dy chooilley chremeyder coontey monney jeh, agh dooys she yn ynnyd ta currit da glaraghyn, er-lheh Rooshish, smoo ta feeu tastey. Ta cloiederyn Rooshagh as goo ard oc ayns y çheer oc hene goaill ayrnyn jishag as mummig Alex as yn ard-noid dunveragh oc Vadim, as t’ad shoh loayrt Rooshish ry cheilley (lesh fo-screeu) son ayrn vooar jeh traa yn episode. Tra ta ayr as moir Alex loayrt Rooshish rish nyn gloan as geddyn ansoor ayns Baarle, ta shin fakin dullidys dy chooilley lught-thie ta shirrey troggal cloan ayns nyn ghlare ghooie ayns çheer yoarree (as adsyn ta loayrt myn-ghlaraghyn lheid as y Ghaelg, son shickyrys).

            Ayns Ekaterina: The Rise of Catherine the Great, voish yn ammyr Rooshagh Rossiya-1 as ry gheddyn trooid Amazon Video, ta shin fakin ben-phrince aeg ass y Ghermaan as ee troailt gys y Roosh dy phoosey yn eirey reeoil. Ta’n ven-phrince as e voir loayrt Germaanish ry cheilley as gynsagh Rooshish, as ta Frangish, Germaanish chammah as Rooshish hene ry chlashtyn neesht mastey ny çhaghteryn joarree ayns y chooyrt. Ta shoh foddey sassey dy chredjal na cloiederyn Sostnagh loayrt Baarle ayns blass Rooshagh!

            Ta drama noa Craith (‘Cron’) ayns yn style ‘Scandi noir’ voish yn ammyr Vretnish S4C goll er jeeaghyn ec y traa t’ayn, as eh ry gheddyn lesh fo-screeu ayns Baarle er BBC iPlayer. Ta shoh troggal er speeideilys Y Gwyll (Hinterland), drama meoiryn-shee gruntit ayns Aberystwyth ta er ve kionnit liorish ammyryn ayns ymmodee çheeraghyn. Gollrish Y Gwyll, ta dagh scene er ny yannoo daa cheayrt, ayns Bretnish as ayns Baarle, as bee yn cummey Baarlagh, fo’n ennym Hidden, er ny chur magh er BBC 1 ’sy traa ry heet.

Dy lhaih shoh ayns Baarle jeeagh er shoh

 

Published: Thu, 01 Jan 1970